Arangkada of Leo Lastimosa for October 11, 2008

            KRISIS SA TRABAHO

 

            Alang sa mga way trabaho, o sa mga wa malipay sa ilang trabaho, atubangan sa nag-ung-ong nga kalibotanon nga krisis sa panalapi, dunay umaabot nga tulo ka dagkong kalihokan nga mahimong makahupay sa ilang kahingawa ug makapahaw-as nila gikan sa kalisod:

·        Ang local ug overseas job fair sa Munisipyo sa Liloan, DYAB Abante Bisaya ug ABS-CBN Cebu karong Oktubre 18;

·        Ang local ug overseas job fair sa Dakbayan sa Sugbo ug sa TV Patrol Central Visayas sa Barangay Guadalupe karong Oktubre 25; ug

·        Ang local job fair sa Dakbayan sa Sugbo, DYAB Abante Bisaya ug ABS-CBN Cebu karong Nobyembre 8 sa Abellana National School.

-o0o-

            Aron pagdugang sa kahigayonan nga motukma ang katakos sa kaliboan ka mga aplikante sa kaliboan sab ka bakanteng mga trabaho dinhi sa Sugbo ug sa ubang kanasuran sa kalibotan, ang mga job fair hanigan daan og pasiunang mga kalihokan:

·        Job Search nga mopahibawo sa mga aplikante unsay gikinahanglan nga mga dokumento, mogiya nila unsaon pagkumbinser sa employers sa ilang kahaom sa bakanteng mga trabaho ug mosangkap nila sa kasayuran unsaon pagtipig sa mga trabaho nga ilang makuha; ug

·        Employers Forum nga mosukna sa mga tagduma sa mga kompaniya unsa ang mga katakos ug kalidad sa mga mamumuo nga ilang gikinahanglan ug moawhag nila pagtabang inay pag-apiki sa mga aplikante pagpagawas sa kinatibuk-an nilang katakos ug kaandam sa pagtrabaho.

-o0o-

            Si Fidel Magno sa Department of Manpower Development and Placement (DMDP) sa Dakbayan sa Sugbo nipasabot nga gikinahanglan ang job search ug employers forum sa matag job fair.  Aron nga di maanugon di lang ang panahon sa employers ug mga aplikante kon dili apil na ang puhonan ug kahago sa mga tigpasiugda.

            Hinaot nga kon mapatuman na ni sa tanang job fair, wa nay mga aplikante nga mahilisan na lang sa tikod sa sapatos pagpangaplay apan di lang gihapon makatrabaho.  Hinaot nga wa nay employer nga mapagaw na lag interview sa mga aplikante apan wa lang gihapoy madawat.

-o0o-

            Apan ang kang-a tali sa katakos sa mga mamumuo ug sa panginahanglan sa mga kompaniya labihan kadako.  Nga di matapakan sa usa lang ka pamilok.  Ni sa pipila lang ka job search ug employers forum.  Duha ka malungtaron nga mga lakang ang gikinahanglan:

·        Una, ang pagpahaom sa mga kurso nga gitanyag sa mga tulonghaan ngadto sa bakanteng mga trabaho sa mga industriya, inay nga iagad lang sa gusto sa mga tinun-an ug mga ginikanan o sa kapritso sa mga tagduma sa mga tulonghaan; ug

*    Ikaduha, ang pagtanos sa direksiyon sa edukasyon ug patigayon—kutob ba lang ta sa pagluhod sa mga panginahanglan sa ubang kanasuran o maningkamot pagbarug sa atong kaugalingong mga tiil sa makiangayon natong luna ubos sa adlaw?  [30]  leo_lastimosa@abs-cbn.com