Arangkada of Leo Lastimosa for October 23, 2008

            LAYAS SA SUGBO

 

            Maayo tingali nga pahinumdoman ang kadagkoan sa lalawigan sa Sugbo nga ang ilang nag-unang gimbuhaton mao ang pag-alagad.  Di ang pagnegosyo.  Nga angay nga unahon nila ang pagtabang sa ubang mga buhatan sa kagamhanan paghatag sa labing batakang mga pangalagad ngadto sa katawhan.  Di ang pag-ukit sa labing gamay nga bikil aron lang mapahawa gikan sa ilang nahimutangan.  Nga ang mas mahinungdanon nila nga tahas mao ang pagtabang sa mga kabos pagtukod sa ilang kaugalingong mga pinuy-anan.  Di ang pagsige og panghudlat pagpalayas nila.

            Sa laktod, angayng pahuwasan sa ilang pagkahubog sa gahom.  Nga di sila maoy tag-iya sa Sugbo.  Kon dili mga suluguon lang sa mga Sugbuanon.

-o0o-

            Labing uwahing gipalayas sa Kapitolyo mao ang Tesda.  Tungod lang kay ang unang gihatagan mao ang NMYC ug nga may kundisyon ang kontrata nga kon di na gamiton sa NMYC ang luna mahibalik sa pagpanag-iya sa lalawigan.  Bahala na kon ang Technical Education and Skills Development Authority (Tesda) mao na ang bag-ong ngan sa National Manpower and Youth Council (NMYC).  Bahala na kon ang mga gimbuhaton sa Tesda susama ra sa mga gimbuhaton sa NMYC—ang pagpalambo sa katakos sa panarbaho ug patigayon sa way trabaho nga mga batan-on ug mga bata nga wa magtungha.

            Bahala na kon ang kinabag-an sa mga nakapahimus sa mga programa sa Tesda mao ang mga molupyo sa lalawigan sa Sugbo.  Ug bahala na nga inay motanyag og tarung nga alternatibo, bugalbugal ray giluwatan sa Kapitolyo nga ibalhin ang Tesda sa SRP ni Cebu City Mayor Tomas Osmena.

-o0o-

            Mas unang gipalayas sa Kapitolyo ang Eruf (Emergency Rescue Unit Foundation), nga nahimutang sa luna sa Cebu Medical Society (CMS).  Dugay rang napupos ang ultimatum nga ilang gipahamtang sa Eruf.  Hinaot nga nakaamgo nang Kapitolyo nga dakong binuang ang ilang laraw ug nga di na lang ihinayon.

            Unsaon man tuod nila pagpatin-aw ang pagpalayas sa Eruf nga nahimo nang institusyon sa paspas ug takos nga pagtubag sa nagkalainlaing katalagman sa bisan asang bahin sa Sugbo ug kasilinganang mga lalawigan?  Labi na kon tinuod ang kasayuran nga nahipos sa kadagkoan sa CMS nga ang ilang luna himuon lang nga parking lot sa higanteng "Ciudad" nga nabulilyaso tungod sa panagsungi sa Kapitolyo ug sa City Hall?

-o0o-

            Angay sang tambagan ang kadagkoan sa Kapitolyo nga ang P2 bilyones nga deposito nila sa bangko di angayng iwara-wara isip tinubdan sa kadungganan.  Kay ang kamatuoran mao nga nangalisbo ning bantayog sa kauwawan.

            Labi na kay padayong napasagdan ang labing batakang panginahanglan sa mga Sugbuanon.  Ang gimbuhaton sa Kapitolyo di ang pagpatambok sa ilang deposito sa bangko.  Kon dili ang paggamit sa panudlanan aron pagtagbaw sa labing dinalian ug mahinungdanong mga panginahanglan sa tinuorayng mga tag-iya sa kuwarta.  [30]  leo_lastimosa@abs-cbn.com