Arangkada of Leo Lastimosa for October 19, 2008

          POBRENG POLIS

 

          Kon pobre ang kapolisan, nganong nakada man og P7 milyones ang delegasyon sa PNP sa tigom sa Interpol sa Rusya?  Kon dato ang kapolisan, nganong payag-payag ra man ang police stations sa hilit nga mga bahin sa nasud?

          Inay ang asawa ra sa retiradong heneral nga nagda sa kuwarta ang maapiki, ang tibuok kapolisan nay naduhig sa makauuwaw nga kontrobersiya.  Salamat sa naandan nga pagtabon sa Malakanyang sa misteryo, ang tibuok nasud na karon ang nagkabulingit.

          Apan ang atong kadagkoan dugay rang nawad-an sa kauwaw.  Ang ila na lang karong gikabalak-an mao nga unsaon pagpasabot sa kabos nga mga polis nganong wa kaabot nila ang minilyon ka pesos nga giwaldas lang sa mga heneral.

-o0o-

          Mahimo ra man untang pasagdan ang asawa ni Heneral Eliseo dela Paz nga mopasabot nganong wa niya ideklarar ang P7 milyones sa ilang pag-abot ug hangtod na sa ilang pagbiya sa Moscow?  Nganong siyay nagda sa dakong kuwarta kon tinuod pa nga contingency fund to alang sa delegasyon.  Ug nganong kuyog siya sa delegasyon nga niretiro na man unta ang iyang bana?

          Mahimo ra sab untang pasagdan si Heneral dela Paz nga maoy modupa sa iyang asawa ug manalipod sa iyang kaugalingon.  Nganong nikuyog pa man sa Rusya nga ubos sa lagda di na man unta siya hatagan og mahinungdanong mga gimbuhaton tulo ka buwan sa di pa sa iyang pagretiro?

-o0o-

          Apan gidalidali pag-usab ang lagda ug gitugotan na ang retiradong mga opisyal sama ni dela Paz nga makapadayon sa ilang mga gimbuhaton hangtod nga wa pay pormal nga tulomanon sa pagpanamilit nila.  Nganong mora man og ang tibuok pamunoan mao na karoy nabalaka nga mabisto ngadto sa kadaghanan ang tinuod nga hinungdan sa dakong bawon sa delegasyon ni dela Paz?

          Ang pagkarakara sa Malakanyang pagpanalipod ni dela Paz makahinumdom nato giunsa sab nila pagtabon ang nabistong kahiwian ni Heneral Carlos Garcia.  Inay tungluhon sa iyang pagsurikbot sa pondo sa kasundalohan, gitino nila nga di kairog ang kaso batok niya.

-o0o-

          Nga makapahinumdom nato nganong natay-og pag-ayo ang nasud dihang nialsa ang batan-ong mga opisyal sa Armadong Kusog nga gipangulohan ni karon Senador Antonio Trillanes.  Napakyas ang pag-alsa sa Oakwood apan nadani ang katawhan sa gibutyag ni Trillanes nga nangalisbong kahiwian sa mga heneral.

          Ang pagdaog ni Trillanes pagka senador maoy sipa sa mensahe gikan sa mga botante ngadto sa Malakanyang nga napuno na sila sa pagpaburot sa naglamurok na nga mga bolsa sa mga nagtungkawo sa gahom.  Apan ang pagdason sa labawng hukmanan sa pagdili nga makalingkod si Trillanes sa puwesto maoy mas sipa nga sumbalik sa mga namunoan nga di nila boluntaryong itugyan ang gipangayo nga kausaban.

          Bisan unsa pa kamakiangayon.  [30]  leo_lastimosa@abs-cbn.com