Arangkada of Leo Lastimosa for November 3, 2008

          NGANONG SI BARAK

 

          Bisan nag-una si Barak Obama sa tanang surveys, bisan sa Fox News nga klarong tua kapusta sa Republicans, ang iyang mga dumadapig di makatug nga maghayang hangtod sa adlaw sa piniliay (Nobyembre 5, Miyerkules, sa oras sa Pilipinas).  May sukaranan ang ilang kabalaka.  Pulos sikit ang nangaging duha nila ka pilde:

·        Niadtong 2000, nidaog si Al Gore sa popular vote apan si George Bush ang nidaog sa electoral vote; ug

·        Niadtong 2004, gilumsan si John Kerry sa kampanya sa kasilag ug pamakak ug bag-ong mga botante nga gipabaha ni Bush sa Ohio ug ubang mga estado.

-o0o-

          Apan bisan wa kinahanglana, ug bisan dako ang kahigayonan nga manlipaghong ko sa kauwaw human sa piniliay, mangahas ko pagtag-an nga modaog si Obama batok ni John McCain.  Ug makaangkon ang Estados Unidos sa iyang labing unang presidente nga itom, nga 148 ka tuig ang nilabay giisip sa mga puti nga mga ulipon.  Niang akong mga sukaranan:

·        Si Obama ang labing kasaligan sa mga Amerikanhon nga motul-id sa mga kasaypanan ni Bush nga nakapalubong sa US sa duha ka wa kinahanglanang gubat ug kinagrabehang ekonomikanhong krisis; ug

·        Ang kakuwang og kasinatian ni Obama palabihon sa mga Amerikanhon kay sa taphaw nga nagkatuiris nga mga baruganan sa mas hinog unta nga si McCain.

-o0o-

          Unsay dinaliang mga implikasyon sa kadaogan ni Obama?

·        Mapamatud-an sa mga puti nga di diay siya terorista ni kaaway sa Kristiyanismo, ug nga mas utokan siya kay sa puti nga iyang pulihan;

·        Makaginhawag luag ang ubang kanasuran nga kamao siyang maminaw nila ug nga di siya molayat sa gubat tungod lang sa way sukaranan nga pagduda; ug

·        Makaamgo ang mga Amerikanhon nga di sila maoy nag-una pagsalikway sa bulok sa panit kay duna nay gagmayng puti nga mga nasud nga nga nipili og pangulo nga itom ug itom nga mga nasud nga nipili ug puti.

-o0o-

          Unsay implikasyon sa kadaogan ni Obama alang sa Pilipinas?

·        Di nang kaulug-ulog si Pres. Arroyo nga lunod-patay siya sa gubat ni Bush batok sa terorismo bugti sa pagbungul-bungol lang sa mga pasangil sa pagpangawkaw ug pagpamatay sa iyang mga kaatbang nga nakapabulingit sa iyang pamunoan;

·        Mapamatud-an nga way sukaranan ang buta nga mga panghinaot nga mahimong mas suod ang US sa Pilipinas ug sa Asya kay nakapuyo si Obama sa Indonesia sa bata pa;

·        Sama sa nangaging mga presidente sa US, palambuon lang ni Obama ang relasyon sa Pilipinas kon mohaom sa ilang kaugalingong mga interes; ug

•             Magpadayon ang determinadong pagpahimus sa US sa katigayonan sa Mindanao, apil nang gituohan nga abundang suplay sa lana sa Sulu, bisan kon ang plano naumol sa wa pa kahunahuna si Obama pagdagan pagka presidente.  [30]  leo_lastimosa@abs-cbn.com