LIPAT SA BAGYO
Wa gyoy klaro ang LTFRB. Gawas nga tihik kaayong 50 sentabos nga us-os sa plitehan sa PUJs ug buses, langay pa gyod. Human gipahibawo nga sa Miyerkules magsugod ang us-os, giuswag ngadto sa Biyernes. Dayon, giuswag na sab ngadto sa Lunes sunod semana.
Human hikawi sa kinadugayang panahon ang mga pasahero sa makiangayong bahin sa pagtidlom sa presyo sa lana sa merkado sa kalibotan, gi-utu-uto pa gyod sila sa kagamhanan. May sukaranan ang pasangil nga ang bugal-bugal nga us-os hanig lang. Aron makapangangkon ang mga nagtungkawo sa Malakanyang nga nagdugo ang ilang kasingkasing alang sa mga pasahero ug busa ang mas dakong laslas sa plite maoy ilang pinaskohan.
-o0o-
Padayong nitibugsok ang presyo sa lana sa merkado sa kalibotan. Sa akong pagsuwat ini, nihagsa ni ngadto sa $65 matag baril. Sa ato pa, $82 nay naiban kon itandi sa pagsulbong sa lana ngadto sa $147 matag baril niadtong Hulyo. Wa gyoy nagtagad paghatag og katin-awan nganong mumho ray nadawat sa mga konsumidor bisan 56% nay nakuha sa presyo sa lana.
Ang kagamhanan, inay mangisog pagpaningil sa labing makiangayon nga us-os sa presyo sa lana lokal nga merkado, kutob ra sa pagarpar ug panghudlat. Kadudahan na hinuon kon hain gyod kapusta. Nagpakabana ba gyod alang sa katawhan? O nawili sa mas dakong Evat nga makolekta kon padayong malansang ang artipisyal nga mas taas nga presyo sa lana.
-o0o-
Sipyat na sang Pagasa. Nipasalig sa ilang forecast gahapon sa buntag nga ang pag-uwan-uwan sa Sugbo ug Kabisay-an nagumikan lang sa low pressure area (LPA) sa amihanan-silangang Mindanao ug sa intertropical convergence zone, nga ilang gihubag nga panag-abot sa bugnaw ug init nga hangin.
Apan ang mga molupyo sa Sugbo, Leyte ug kasilinganang mga lalawigan nahibung sa kangiob sa panahon, sa kakusog sa uwan ug sa huros sa hangin. Naglisod sila pagsabot nganong ang Pagasa na lay wa mahibawo nga bagyo nay ilang nahiagoman. Dihang gidasonan sa Pagasa ang ilang pagduda, uwahi nang tanan.
-o0o-
Nakabiya na sa ilang mga panimay ang mga molupyo ug nahinayak na pag-adto sa mga pantalan sa wa pa usba sa Pagasa ang ilang pangagpas. Apan ang ilang kahasol di ikatandi sa kakuyaw sa mga pasahero sa gagmayng mga barko nga nahinayak na sa paglarga ug nasugamak sa makalilisang nga dagkong bawod sa kadagatan.
Ang forecast sa LPA giluwatan sa Pagasa alas-5 gahapon sa buntag ug epektibo sa mosunod nga 24 oras. Alas-9 na sa buntag, dihang ningitngit ug nag-uwan na pag-ayo, nga napagawas ang severe weather bulletin sa bagyong Quinta. Sa akong pag-abli sa ilang website (http://www.pagasa.dost.gov.ph/) gahapon sa hapon, nagpabilin pa ang duha ka nagkasungi nga forecast. Nga morag gipasagdan lang ang tibuok kalibotan nga makasaksi sa labing uwahi nilang pakauwaw. [30] leo_lastimosa@abs-cbn.com
No comments:
Post a Comment