LAB-AS NGA SABLIG
Mahimo untang taguon ni Cebu City Mayor Tomas Osmeña ang iyang kanser. Mahimo unta siyang mopasangil nga moduaw lang sila si Margot sa ilang anak nga si Miguel ug magbakasyon sa Estados Unidos. Apan gipili niya ang pagtug-an sa mga Sugbuanon sa tinuorayng kahimtang sa iyang panglawas. Nga nag-ungaw siya karon sa kamatayon.
Mao nga di siya angay nga mahibung sa kainit ug kalapad sa mga pangaliya ug sa kamatinud-anon sa pagpaluyo sa mga Sugbuanon ning lisod niyang kahimtang. May gahom ug katakos unta siya pagtabon sa kamatuoran. Apan gisalikway niya ang kangitngit. Gipili niya ang kahayag. Ug giatubang bisan unsay sunod nga mahitabo niya.
-o0o-
Kon nagpadailos pa sa dangog nga tentasyon, di hinuon makapaabot si Osmena nga matago ang tinuod niyang sakit. Ang kaabtik sa mga sakop sa media ug ang katabian sa pipila sa iyang mga doktor ug mga kawani sa tambalanan motino nga mahibaw-an lang gihapon ang bisan unsa nga gusto niyang tagoan.
Apan di ning kaiban sa katalagsaon sa iyang kamatinud-anon. Labi na atubangan sa naandan nga pamakak ug pagtabon sa iyang kaubanan nga mga politiko ug kadagkoan sa kagamhanan. Pasayloa kon mosiwil. Apan ang pag-angkon ni Osmena sa iyang kanser morag lab-as nga sablig sa bugnawng tubig sa naglingiting nga mga pangulipas sa ubang nagtungkawo sa gahom.
-o0o-
Si Osmena wa igdungog sa iyang kamapaubsanon. Mas sayon unta alang niya ang paglikay sa bisan unsang kahigayonan pagpakita sa publiko sa iyang kahuyang. Mas makaayo unta alang sa iyang garbo kon wa pa ipasundayag sa mga Sugbuanon ang iyang pagduko sa bag-ong kaatbang nga mahimong di na niya masuklan.
Sa pikas nga bahin, si Osmena mahimong untang magpadaog sa katalaw. Mahimo unta siyang moyaka ug mongaab. Nganong siya man intawoy natakboyan sa makamatayng sakit ning tandugon nga bahin sa kasaysayan sa dakbayan? Apan gigamit hinuong iyang sakit pagtudlo sa mga Sugbuanon nga duna silay giatubang nga mas dako ug mas dinaliang mga suliran.
-o0o-
Kon lunlon puti pa ang gisul-ob ug may pako pa lang unta si Osmena, mohunong na unta siya pagpanaway sa iyang politikanhong mga kaatbang. Mohunong na unta pagpanalipod sa SRP ug sa CCSC ug pagbugalbugal sa CICC. Ug motingob na lang sa iyang panahon sa mas mahinungdanon ug mas malungtarong mga bahin sa atong pagpuyo ning walog sa mga luhaan. Sama pananglitan sa tinuorayng tumong sa atong pagpakabuhi. Ug sa kinabuhing dayon.
Si Osmeña di pa santo. Wa pa mamatay. Dako ang kahigayonan nga mabuhi pa ug makatiwas sa iyang termino sa 2010. Maong di pa andam nga mamuhi sa nahibilin niyang mga damgo ug pangandoy. Apan di ni igong sukaranan nga di nato siya ipangaliya. Ug pasidunggan sa iyang kamatinud-anon. [30] leo_lastimosa@abs-cbn.com
No comments:
Post a Comment