UTOK SA KRISIS
Ang kagamhanan ni Pres. Arroyo, bisan sa kadaghan na sa desperadong mga lakang nga gihimo—sama sa pagsuspenso sa NFA retailers, pag-repack sa NFA rice, paghudlat sa mga magpapatigayon ug pagpakitabang sa Simbahang Katoliko ug sa lokal nga mga opisyal, wa pa moangkon nga dunay krisis sa bugas humay. Ambot napakyas ba lang pagtugkad sa kanihit sa suplay ug kataas sa presyo sa bugas ug ubang pagkaon sa tibuok kalibotan. O naglikay lang pag-angkon og responsibilidad sa kapakyas pagpalambo sa seguridad sa pagkaon sa nasud.
Ang unang lakang pagsulbad sa suliran mao ang pag-angkon nga dunay suliran. Tungod sa pagdumili sa kagamhanan pag-atubang sa krisis, nagyagaw ang mga lakang nga ilang gipasiugdahan. Gawas lang kon ila gyong tuyo ang paglibog sa katawhan aron malipat sa mas dagko pa nilang mga maniobra.
-o0o-
Sa di pang kabuylo ang nagpakabana nga mga hut-ong sa katilingban pagpaningil diin paingon ang binilyon ka pesos nga gibubo pagpalambo sa agrikultura, ang kagamhanan maoy nag-una pagpanulisok. Unang gibasol ang mga magpapatigayon nga gipasanginlang nanago sa bugas ug nagpaburot pag-ayo sa ilang ginansiya. Apan dihang nisukol ang mga magpapatigayon ug nisumbalik paghulga og rice holiday—ang paghunong na pagpangompra ug pagpamaligya og bugas, nagdalidali ang kagamhanan pagpangita og laing kadakdakan.
Ang sunod nilang nakit-an mao ang mga konsumidor. Nga mao na karoy gipasanginlan nga nanago sa bugas sa ilang mga panimay. Kaluoy sa katawhan. Sila nay napiit sa kataas sa presyo, karon mao pay gipasanginlan nga tinuod nga utok sa krisis.
-o0o-
Unsaon man intawon pagtago sa katawhan sa bugas nga maglugos man gani ang kinabag-an nila pag-abot sa gipaburot na pag-ayong presyo sa commercial rice? Pruyba nga way kuwartang mga konsumidor mao ang nagkataas nga pila sa NFA rice outlets. Pruyba nga way pagpanago sa mga bugasan mao ang tiyabaw sa mga magpapatigayon sa commercial rice sa pagtidlom sa ilang halin.
Kon di magbantay ang katawhan, kuyaw nga kitay sunod nga pasanginlan sa fertilizer scam, swine scam ug irrigation scam. Kon magpatuyang ang kagamhanan sa ilang gibati, mahimong kita say tulisukon sa NBN scam ug bisan sa Hello Garci scandal.
-o0o-
Daghan untang gustong mopakpak sa maisugong pasidaan ni Arroyo pagbilanggo sa mga nagtago sa bugas. Hangtod nga may nakasukna nila kon unsa man say silot nga ipahamtang batok sa mga nagtago sa kamatuoran. Hilas tinuod nga paminawon ang kagamhanan nga motunglo sa mga kalapasan. Kon ang iyang labing dakong opisyal gipasanginlan sa labing bangis pa nga krimen—ang pagkawat sa mandato sa katawhan.
Angay tinuod nga silotan ang mga nagpaburot sa ilang ginansiya sa bugas. Apan ang mga nangampanya karon batok sa bag-ong mga kontrabida mao ang mga opisyal sa kagamhanan nga mas nagpaburot sa mas nangalisbong pangurakot. [30] leo_lastimosa@abs-cbn.com
No comments:
Post a Comment