Arangkada of Leo Lastimosa for April 11, 2008

            YAGAW SA BUGAS

 

            Sama sa naandan, saligi ang katakos sa kagamhanan pagsabotahe bisan sa labing yano niyang mga proyekto, nagkayamukat ang pagpatuman sa programa ni Pres. Arroyo paghatag og tagsa ka kilong bugas sa matag tinun-an sa day care centers ug Grade 1 sa public schools.  Ang programa maoy tubag sa Malakanyang sa nangaging surveys sa pagdaghan sa gipanggutom nga mga pamilya.  Nasentro ni sa atensiyon karong bag-o tungod sa pagmahal sa commercial rice ug sa kadaghan sa nagpila alang sa NFA rice.

            Ug tungod sa makauuwaw nga mga bulilyaso:

·        Nakalimot ang Malakanyang nga ang paghatag sa 35 ka kilo sa matag tinun-an nagkinahanglan og 35 ka adlawng tingtungha kay naapsan sa pagtapos sa klase;

·        Bisan wa nay klase, gipabalik lang gihapon ang mga tinun-an, kuyog ang ilang mga ginikanan, ang uban nila kinahanglang moplite og gikan sa P20 ngadto sa P40, aron lang pagkuha og usa ka kilong bugas nga balor og P18.25; ug

·        Kay wa may klarong bodega ang mga tulonghaan, gisugdan nag pangawat ang nahibiling sinakong mga bugas.

-o0o-

            Nagkaguliyang sab ang pagpatuman sa Malakanyang sa laing programa, ang Tindahan Natin, nga gitumong unta paghatod sa baratong NFA rice ngadto sa labing kabos nga mga molupyo:

·        Ang unang hugna sa bugas gilangaw, way halin, kay mga sipsip sa palasyo namugos nga himuong iron-fortified, aron nga makabarato na maka-brayt pang bugas—uwahi na nilang nahibaw-an nga ang iron makadali pagpan-os sa kan-on, nga kon di mahurot ang linung-ag sa pamahaw mabaho na inigka hapon;

·        Ang makapalit sa Tindahan Natin kinahanglang may rekomendasyon sa mga opisyal sa baranggay, busa ang mga kaatbang sa politika, bisan unsa nila katimawa, maglaway lang sa baratong bugas;

·        Tungod sa kanihit sa rice allocation gikan sa NFA, may mga Tindahan Natin nga mangabli lag duha ka oras sa usa ka adlaw sa semana; ug

·        Ang ubang tagduma sa Tindahan Natin nga way kasinatian sa bugas nanglaktod pinaagi sa pagbaligya sa ilang allocation sa mas taas nga presyo ngadto sa retailers, kinsa nisagol dayon sa NFA rice ngadto sa commercial rice alang sa mas dakong ginansiya.

-o0o-

            Ang NFA nabiktima sa ilang kaugalingong pagarpar:

·        Niangkon ang lokal nilang mga opisyal nga lisod ipatuman ang pasalig sa ilang ulohang buhatan nga usbawan ang allocation ngadto na sa lima ka kilo matag konsumidor kay mahurot nang ilang imbentaryo nga mas gikinahanglan sa tingnihit nga mga buwan sugod karong Hulyo;

·        Nga mahimong mao say hinungdan nganong  napakyas paghatod sa gikasabotang gidaghanon sa bugas ngadto sa mga parokya sa Metro Manila nga nitabang na pagpamaligya; ug

·        May sukaranan ang pagduda may ikahatag pa bang bugas sa local government units (LGUs) nga natental na sab pagnegosyo og bugas.  [30]  leo_lastimosa@abs-cbn.com