Eee ug Wifi
Sa unang pagkakita nako sa Eee PC, nadani dayon ko. Sa presyong tag-P19,000 ra, mas barato kay sa bag-o ug tigpaka-aron-ingnon nga mga telepono. Gamay, nipis ug gaan pa gyod. Mahimo rang sipitan. Bisan di nindot ang sudlanan, mahimong dad-on nga naghukas ra. Mahimong sabakon lang. Aron maablihan dayon kon may mahunahunaang suwaton. O may kahigayonan paghimo sa natanggong nga mga gimbuhaton bisan gawas sa imong buhatan.
Labaw sa tanan, ang Eee PC nagamit og Linux nga operating system. Mahimong paliton isip protesta sa pagpaburot pag-ayo ni Bill Gates ug sa Microsoft sa overpriced kaayo nilang Windows.
Apan bisan ning tanang madanihong argumento, wa dayon ko mopalit sa baratong laptop. Tungod sa mas mapuslanon nakong telepono.
-o0o-
Tanan nakong kinahanglan sa laptop mahimo sa karaan na apan magamit pa nakong telepono. Bisan sa kagamay sa keyboard, makatrabaho ko uban sa Word, Excel ug bisan Power Point presentation. Kon kinahanglang i-email dayon ang akong trabaho, dali rang ablihon ang gaan apan paspas kaayong GMail application sa akong desktop.
Mahimo kong mag-online ginamit ang Smart Internet nga tag-P10 ra matag 30 minutos. Ang pag-email sa mga dokumento di abtan og lima ka gutlo busa may igo pa kong higayon pag-surf sa Google Reader, nga mohipos sa tanang balita gikan sa tanang pamantalaan sa bisan asang bahin sa kalibotan, ug ubang sites nga makatabang sa akong trabaho. Mahimo sab kong mogamit sa wireless LAN kon maatlan sa wifi spots, nga nagkadaghan na ron sa Sugbo.
Apan di tanang wifi libre.
-o0o-
Labing maayong wifi nga akong nasuwayan mao ang sa Manila Pen, ang hotel nga gisakmit nilang Senador Antonio Trillanes IV sa niaging tuig. Gawas sa libreng wifi sa lobby, nga kasudlan bisan kawhaan pa ka tangkeng iggugubat, hatagan ka nilag LAN cable ug busa mahimong magbuntagay og internet sa imong lawak.
Apan may hotels sa Sugbo nga tag-P1,000 ang wifi. Sa uban kinahanglan kang mangayog password, aron pagtino nga mopalit ka sa di pa mag-wifi. Akong kinaham mga kay wa kinahanglanang password, maong Sykes sa Panagdait, Sports Club sa Ayala ug Coffee Bean sa North Wing sa SM City.
-o0o-
Nakapakumbinser nako pagpalit na lang god og Eee PC mao ang tanyag sa nagbaligya nga ilisan nilang OS og Windows XP Pro. Ang kasayon ra pag-install og applications sa XP nakawani sa akong argumento batok sa Microsoft.
Nakabayad na kog P18,000 sa akong laptop dihang nakit-an nako sa sunod tindahan nga P15,000 rang ilang Eee (2 gigabytes ra hinuon kon itandi sa akong 4G). Mamalita na ko sa akong mga higala sa kabarato na lang sa bag-ong stocks sa Eee. Hangtod nga usa nila nipakita nako og advertisement sa tindahan nga namaligyag Eee PC nga tag-P13,000 na lang. [30] leo_lastimosa@abs-cbn.com
No comments:
Post a Comment