Arangkada of Leo Lastimosa for April 14, 2008

       APIL SA LIKOY   

 

       Ang Visayas Ombudsman moapil na pagpangimbestigar sa gipasangil nga pagsagol sa NFA rice ug commercial rice nga gibaligya sa mas taas nga presyo.  Dako tinuod ang krisis sa bugas ug busa gikinahanglan ang tabang sa tanang ahensiya sa kagamhanan nga maputol ang artipisyal nga kanihit sa suplay ug mabadlong ang palabing pagpaburot sa presyo.

        Apan mingaw nga reaksiyon sa katawhan sa pag-apil sa Ombudsman sa kontrobersiya sa bugas humay.  Nanukad ni sa mosunod nga mga hinungdan:

·        Ang Ombudsman maayo lang sa pagsugod pag-imbestigar sa mga kaso, labi na kon ma-headline sa media, apan maihap ra sa tudlo ang matiwas;

·        Maayo lang ang Ombudsman kon gagmay ang nakahimog kahiwian apan wa nay ek kon duol sa luwag sa Malakanyang ang nakalapas.

-o0o-

        Ang paglusad dinhi sa Sugbo sa caravan batok sa pangurakot sa niaging buwan, kanus-a nagkanta-kanta pa gani si Ombudsman Merceditas Gutierrez atubangan sa mga representante sa hapit tanang ahensiya sa kagamhanan ug pribadong sektor, wa makapatulin sa pag-atiman sa nag-ung-ong nga lokal nga mga kaso nga pulos nahilambigit sa niaging 12^th Asean Summit:

·        Padayong giyak-an ang mga kaso sa surveillance cameras ug decorative lamps bisan nabisto nang grabe ang overpricing;

·        Pabiling nikakak ang Ombudsman sa pag-imbestigar sa mga pasangil sa kahiwian sa pagtukod sa Cebu International Convention Center (CICC), nga hangtod karon wa pa matino kon pila gyoy naggasto; ug

·        Wa gyod gani magunok ang Ombudsman pagsusi sa mga pasangil nga overpriced sab ang road projects sa ceremonial route ug ubang kadalanan sa Sugbo.

-o0o-

        Ang mosunod maoy dugang mga kaso nga mas dugay pang natanggong apan wa pa gyod matiwas sa Ombudsman:

·        Ang pasangil sa pangurakot ug paghimong diploma mill sa CSCST ubos ni kanhi presidente Jose Sal Tan, nga gikahadlokang gipadayon sa bag-ong liderato;

·        Ang pasangil sa pangurakot sa kuwarta sa PTCA; ug

·        Ang pasangil sa kahiwian sa pagpamalit sa Dakbayan sa Sugbo og kemikal alang sa dengue pila ka tuig nang nilabay.

-o0o-

        Maugmaan ta kon akong ihurot paglista dinhi ang tanang nag-ung-ong nga mga kaso.  Nga saba kaayong Ombudsman sa sinugdanan.  Apan mingaw pa sa tirana ang resulta.  Way bisan gamay na lang katin-awan nganong hangtod karon wa pay nakiha.

        Kon imong tan-awon ang mas dako nga hulagway, makasabot ka nganong, sama sa ubang mga institusyon nga gibuong ni Pres. Arroyo sa iyang desperadong paningkamot pagpabilin sa gahom, nilikoy sab ang Ombudsman.  Kay pulos man tinudlo ug utangan sa Malakanyang ang ilang kadagkoan, ang Ombudsman kutob ra sa mga kartero nga nakakawat og P100.  Apan di gyong kahikap sa mga sakop sa gabinete ug ubang opisyal nga sikit-pa-sa-ampaw-sa-Carcar ngadto nilang Arroyo ug sa iyang mga itoy.  [30]  leo_lastimosa@abs-cbn.com