BUGAS NI REGAN
Nitiyabaw si Regan King nga dako nang iyang alkanse tungod sa pagtanggong sa Bureau of Customs sa iyang kargamento nga 30,000 ka sakong Vietnamese rice. Nga nasamotan pa gyod sa pagronda sa mga ahente sa NBI ug NFA sa bodega nga iyang giabangan sa Cabancalan, Mandaue City.
Kon iphon ang mga adlaw nga nausik sukad sa pagdunggo sa kargamento niadtong Semana Santa—duha ka semana nang nilabay—may sukaranan tuod ang reklamo ni King. Apan kon susihon ang mga hinungdan nganong padayon nga natanggong ang kargamento hangtod sa ronda karong semanaha, motumaw nga si King may papel sab sa kalangay. Mahimo ganing kapasanginlan nga maoy naghinay-hinay sa pagdiskarga sa iyang bugas humay aron ma-imbentaryo dayon sa customs.
-o0o-
Kon tinuod gyod siyang nagdali nga mabaligya dayon ang bugas humay, mahimo bang ipasabot ni King nganong wa pa siya mahuman pagbalhin sa kinatibuk-ang kargamento ngadto sa inabangan niyang bodega? Tinuod bang sulti sa kadagkoan sa customs nga tulo ra ka kargador ang iyang gisuholan sa pagdiskarga sa bugas humay? Ug tinuod ba nga gamay ra kaayo ang bodega nga iyang giabangan alang sa 30,000 ka sakong Vietnamese rice?
Sa pikas nga bahin, mahimong mas modako pang ginansiya ni King kon malangay ang pagbaligya sa iyang bugas humay. Kay kon madugangan og 30,000 ka sakong bugas matag buwan ang lokal nga merkado dako ang kahigayonan nga mous-os, o bisan mohunong na lang sa pagsaka, ang presyo. Hinaot nga nataligam-an lang ni King, ug nga di niya tinuyo, ang kaluya sa lihok sa iyang bugas humay.
-o0o-
Dungan sa iyang paghulga nga mohunong na lang sa pagnegosyo og bugas, nga mora na hinuon og utangan ang mga Sugbuanon niya, si King niingon nga inay mabaligya ang bugas og kapin lang sa P20 ang kilo, mahimong mabaligya na ni og tag P50 ang kilo tungod sa kalangay.
Mahimo bang tultolan ni King ang pamunoang Arroyo diin niya palita ang bugas? Kay ang presyo karon sa bugas humay sa merkado sa kalibotan tag-P31,000 na matag tonelada. Gawas lang kon nagnegosyo lang si King aron maalkanse, di niya mabaligya ang bugas og mas ubos kay sa P32 matag kilo.
-o0o-
Gawas lang kon may sekretong tinubdan sa baratong bugas si King nga wa matultoli sa uban, lisod ipatin-aw ang kaubos ra sa presyo sa iyang bugas.
May sukaranan bang mga pagduda nga gituyo ni King pagpaubos ang iyang presyo aron makadaginot sa buhis nga kinahanglan niyang bayran sa kagamhanan? Kay kon sama sa NFA, tag-P31,000 sab matag tonelada ang iyang palit sa Vietnam, P15,500 ang iyang bayran nga buhis sa customs. Kon mas ubos ang presyo nga iyang itug-an, mas gamay sang buhis nga iyang mabayran. [30] leo_lastimosa@abs-cbn.com
No comments:
Post a Comment