Arangkada of Leo Lastimosa for April 12, 2008

       TINULISOKAY SA BUGAS

 

Naglaway lang ang mga Sugbuanon sa pagpausbaw sa NFA ngadto sa lima ka kilo nga mabaligya sa matag pumapalit sa NFA rice.  Kay ang lokal nga mga tigbaligya wa pang kadawat sa lagda sa kausaban.  Maong nalansang sa tagsa ka kilo lang gihapon ang labing daghang nabaligya sa matag mopila nga konsumidor.

Apan bisan pa kon moabot na dinhi sa Sugbo ang kausaban, gikahadlokan nga inay makasulbad makapasamot hinuon sa kaguliyang sa binaligyaay sa baratong bugas.  Kay nagpabilin nga 20 lang gihapon ka sako ang sinemana nga rice allocation alang sa matag retailer nga lisensiyado sa NFA.  Sa ato pa, ang mas daghang mabaligya nga bugas sa matag customer nagkahulogan nga mas gamay rang mga konsumidor nga makapahimus.

-o0o-
       

Ang di gyod angkunon sa NFA mao nga dako kaayo ang kang-a tali sa aktuwal nilang imbentaryo sa bugas humay sa ilang mga bodega ug sa gipanghambog nilang kaabunda.  Mao nihinungdan nga wa nila matuman ang gisaad nga gidaghanon ngadto sa mamaligya nga mga parokya sa Metro Manila.

Mao sab ni hinungdan nga tag-20 ka sako ra matag lungsod ang ilang nasaad ngadto sa mga mayor nga nagtapok sa Kapitolyo.  Kutob ra sila sa hikuhiko.  Apan di gyod silang kabisto nga namakak ang ilang mga amo nga naglakip ni Pres. Arroyo.  Nga di sila mahimong mopabaha og NFA rice sa way pagsakripisyo sa ilang imbentaryo nga mas gikinahanglan sa tinuod nga tingnihit sugod karong Hulyo.

-o0o-

Hangtod karon, motuo mog sa dili, di pa gihapon moangkon si Arroyo nga dunay krisis sa bugas.  Bahala na kon nagkarakara na sila paghimo og bisan unsa na lang nga desperadong mga sugyot:

·        Pagpausbaw og P1 nga uminto sa NFA rice;

·        Pagpahamtang og price control;

·        Pag-usab sa kolor sa NFA rice ngadto sa, panggunit mo sa lingkoranan, pink; ug

·        Bisan ang Simbahang Katoliko giawhag na sa pag-import og bugas humay.

-o0o-

Si Arroyo nigamit sa kontrobersiya sa bugas pag-igo sa iyang politikanhong mga kaatbang.  Nitataw siya nga ang gikinahanglan sa katawhan dili pamolitika kon dili bugas.  Matod niya inay magsige og panaway sa iyang pamunoan, mas maayo nga ang mga senador motabang pagpalambo sa suplay sa pagkaon.

Susama ra nga ang iyang mga kaatbang maoy gibasol ni Arroyo sa krisis sa bugas nga wa niya angkona.  Maong tukma ang tubag sa oposisyon.  Nga angayng angkunon una ni Arroyo ang krisis, dawaton ang responsibilidad sa suliran ug mangayo og pasaylo sa katawhan sa kapakyas pagpalambo sa agrikultura.

May sukaranan si Arroyo nga mas nahadlok sa krisis sa bugas kay NBN ug ubang eskandalo.  Kay ang kagutom mas mabatyagan sa kinabag-an sa katawhan.  Kay sa nagkalapad nga katimawa ug kakabos tungod sa way kinutoban nga pangurakot.  [30]  leo_lastimosa@abs-cbn.com