SAMOT ANG KRIMEN
Ang sunudsunod nga mga pagpamanhig ug pagpamatay sa gidudahang mga criminal sa Sugbo maoy pahinumdom nga wa pa mopahuway ang mga vigilantes. Nga nagpabilin pang baskog ug isog ang mga tawo nga determinadong mokumkom sa balaod ug mobuong sa sistema sa hustisya.
Bisan kinsa pay responsable sa laktod nga hustisya—ma-biktima man sila sa krimen nga nangunay pagpanimawos sa ilang gidangatan; o ma-polis man nga kumbinsidong ang sistema sa hustisya kalutsan lang sa banggiitang mga kriminal; o ma-kriminal man nga naneguro nga di makapiyait ang ilang kaubanan nga nadakpan—pulos sila nakalapas sa balaod.
Ang ilang paghipos sa suspitsadong mga kriminal wa makaiban, hinunoa nakadugang hinuon sa eskandalo sa lapad ug way pupanagana nga pagpangyatak sa balaod.
-o0o-
Gatosan na ang mga biktima sa vigilantism sa Sugbo. Way bisan usa sa mga responsable ang nadakpan. Labaw nang way nasilotan sa hukmanan. Nga maoy labing dakong tilimad-on nga organisado ang mga vigilantes: May nagsugo nila, may nagsuhol nila ug, labaw sa tanan, may nagdupa nila. Gamhanan gyod tingaling ilang padrino nga wa may bisan usa ka ahensiya sa kagamhanan nga nakabaraw sa ilang salida.
Angayng manlipaghong sa kauwaw ang kapolisan. Nitumaw ang vigilantism tungod sa ilang kapakyas pagsumpo sa krimen ug pagsikop sa mga kriminal. Tungod ini, angay na nilang ilubong ang ilang mga ulo sa bas kon may nahibilin pa silang kaikog. Ang kapakyas pagbadlong sa mga vigilantes ikapatin-aw lang sa ilang paglingiw, o pakigkonsabo gyod, sa bantang nga pasundayag sa salaod. Tungod ini, kon may nahibilin pang kaligdong, angay silang mahilis ug di na pakita.
-o0o-
Di kalikayan nga may mga hut-ong sa katilingban nga moabiba sa mga vigilantes. Labi nang mga nabiktima sa kabagis sa krimen. Kay mas maayo na lang nga ang mga nanghasi nila maoy nanghay-ad. Kay sa makapadayon pa pagbiktima sa ubang inosenteng mga sibilyan.
Apan ang ilang pag-idolo sa mga vigilantes di dumalayon. Tino silang mohunong na pagpakpak kon, simbako layo ra to, ilang mga minahal sa kinabuhi nay maduhig. Masipyat man ganing mga polis nga kapaninglan unsa na kaha ang mga ahente sa kangitngit nga di mahimong taralon sa Ombudsman?
-o0o-
Di hinuon kong kapasalig nga di ko moapil og pakpak kon ang mga vigilantes di kutob ra sa mga kawatan, tulisan ug mangingilad. Ug nga magsugod na sila pagtumba sa kurakot sa mga opisyal sa kagamhanan. Lisod hinuong tuohan nga mas dako ang ilang gugma sa nasud kay sa kahadlok sa ilang amo.
Maong magpadayon ang mga vigilantes pagdaginot sa mga target nga di kapanagang ni kasukol. Apan magpadayon sang pagsulbong sa kriminalidad. Kay di kahadlok sa vigilantism ang makabadlong sa mga kriminal. Kon dili ang pagpungil sa gamot nga mga hinungdan sa katimawa ug inhustisya. [30] leo_lastimosa@abs-cbn.com
No comments:
Post a Comment