Arangkada of Leo Lastimosa for May 19, 2008

       UTANGAN NI ESPERON?

 

       Nangita og labad sa ulo si Pres. Arroyo.  O nahulga lang sa bag-ong yugto sa eskandalo sa NBN-ZTE.  Ug nga determinado lang gyod nga magpabilin nga magtungkawo sa gahom.

        Gitudlo dayon niya og katungdanan sa kagamhanan ang iyang kinaham nga heneral, si Hermogenes Esperon Jr.  Pila lang ka adlaw human papahuwaya pagka hepe sa Armadong Kusog.  Sa tanang katungdanan nga kapilian, si Esperon pa gyoy iyang gitudlo nga bag-o niyang magtatambag sa mga sabutsabot sa kalinaw uban sa nagkalainlaing pundok sa mga rebelde.

        Mahimong wa lang gyoy tinguha si Arroyo pagkab-ot og malungtarong kalinaw uban sa mga rebeldeng komunista ug mga rebeldeng Muslim.  O wa pa kahingpit og bayad sa iyang dakong utang ni Esperon.

-o0o-

        Si Esperon namantsahan human gilambigit sa kontrobersiyal nga Hello Garci tapes sa giingong pagpanikas sa piniliayng presidensiyal sa Mindanao niadtong 2004.  Apan tungod sa iyang kamatinud-anon ni Arroyo, ug sa talagsaon niyang katakos pagtuman bisan unsay sugo sa commander in chief, gitudlo si Esperon sa labing taas nga katungdanan sa militar.  Ug gilugwayan pa gani ang iyang termino.

        Tuod man, napamatud-an ni Esperon ang iyang katakos sa pagdugmok sa tanang mga pagsuway sa batan-ong mga opisyal sa militar, nga nitunglo niya isip simbolo sa naghitak ug wa gyod masulbad nga pangurakot sa Armadong Kusog, pagpalagpot ni Arroyo sa katungdanan.

        Ang pagdalidali pagtudlo pagbalik ni Esperon, bisan wa pang kabuylo ang iyang bakasyon nga gimando sab ni Arroyo, nagtimaan sa kabalaka sa Malakanyang nga ang bag-ong liderato sa kasundalohan di sama kalig-on.  Ug ka-lunod patay.

-o0o-

        Wa katabang pagpahumot ni AFP Chief Alexander Yano ngadto sa Malakanyang ang iyang pamahayag sa labing unang pagduaw sa iyang yutang natawhan, ang Mindanao, sukad sa pagpuli ni Esperon:  Gisalikway niyang pasalig nilang Arroyo ug Esperon nga mapapas nang rebelyon sa mga komunista sa tuig 2010.  Matod ni Yano maibanan lang apan di gyod mahanaw ang rebelyon sa komunistang New People's Army.

        Klarong way bilib ang Malakanyang sa saad ni Yano atol sa iyang pag-asumir sa katungdanan nga batokan ug pulpugon ang bisan unsang pagsuway pag-ilog sa gahom nga wa mahisubay sa batakang balaod.  Maong gipabilin si Esperon nga magtungkawo niya.

-o0o-

        Sukwahi sa sibaw nga mga huhungihong human mopahibawo si Press Secretary Ignacio Bunye nga itudlo siya sa Monetary Board sa Bangko Sentral ng Pilipinas sunod buwan, wa matudlo ang Sugbuanong si Cerge Remonde pagka press secretary.  Bisan mas gamhanan ang iyang katungdanan isip pangu sa Presidential Management Staff (PMS) daghang nagtuo nga mas epektibo siya isip tigpamaba sa presidente.

        Ang gitudlo ni Arroyo nga mopuli ni Bunye sugod sa Hunyo 16 mao si Jesus Dureza, beteranong magsisibya sa Davao, kinsa mao say pulihan ni Esperon.  [30]  leo_lastimosa@abs-cbn.com