Arangkada of Leo Lastimosa for May 8, 2008

            PAPOBREHAY

 

            Lahi ug talagsaon ang scholarship program sa Ambit Foundation.  Papobrehay.  Di pa-braytay.  Lahi sa ubang scholarships nga kapahimuslan lang sa utokan apan kabos nga mga tinun-an, ang Ambit moabaga sa tanang gastohan sa labing kabos nga mga tinun-an nga determinado nga motiwas sa pagtungha.

            Nga alang nako maoy labing makiangayon.  Kay kon mga brayt ray may kahigayonan nga malibre sa pag-eskuyla, kinsa na man lay mosagakay sa di intawon tag-as og mga grado?  Tungluhon ba nga kutob ra sa pagbuguy-bugoy sa eskina tungod lang kay wa manghawod sa ilang mga klase?  Hinaot nga ang gisugdan sa Ambit manakod sa ubang mga institusyon.  Aron pagtino nga ang labing tabanganan gyod maoy maagak.

-o0o-

            Kay di tanang nagbitay sa klase mga bugo.  Di ang gitas-on sa ilang grado maoy motino sa determinasyon sa mga bata paglampos sa pagtungha.  May kaliboan ug usa ka mga hinungdan nga makabira sa mga grado sa mga bata gawas sa kalantip sa salabotan.

            Matod ni Fr. Vic Labao, usa sa mga haligi sa Ambit Foundation, may mga bata silang natabangan nga ubos kaayo ang grado tungod kay way suga sa ilang bay ug kinahanglan pa intawong magpatungod sa poste sa Veco aron makatuon.  May mga bata sab nga way luna nga katun-an kay ang ilang bay hinimo lang sa gisumpay-sumpay nga mga karton nga gitapot sa koral, o sa ilawom sa taytayan.

            May mga bata sab nga di mahinultol pagbasa sa iyang mga leksiyon kay kanunayng mag-away ang iyang mga ginikanan ug mga igsuon.  Samang may mga bata nga diriyot mangahagbong kay way ikaplite padung sa eskuylahan.  O di mahinultol pagpaminaw sa magtutudlo kay kanunayng nagkutoy ang tiyan.

-o0o-

            Wa magtubod ang kuwarta sa Ambit Foundation.  Busa di silang kapada sa ilang scholars sa pribadong mga tulonghaan.  Ang ilang scholars sa elementarya ug high school pulos nagtungha sa public schools.

            Laing nakalahi sa scholarship mao nga matag scholar dunay guardian.  Ang mga tawo nga way ikaamot nga kuwarta motampo sa ilang panahon.  Mga boluntaryo sa Ambit makigtagbo sa mga bata ug sa mga ginikanan pagtino nga makalahutay sa klase ug makatiwas sa pag-eskuyla.

Kon gusto kang motampo og kuwarta o panahon, matawag nimo ang 3465231.

-o0o-

            Aron paghatag nimo og ideya unsa kadako ang mahimo sa labing gagmayng mga hinabang:

·        P500 – makapalit og notebooks ug school supplies sa 10 ka tinun-an sa elementary;

·        P1,000 – makahatag og pagkaon alang sa 30 ka malnourished nga mga bata sud sa usa ka buwan;

·        P5,000 – makabayad og usa ka tuig sa high school;

·        P10,000 – makahatag og nutrition training program sa mga ginikanan;

·        P25,000 – makabayad og usa ka semestre nga sa kolehiyo; ug

·        P50,000 – pasiunang puhonan sa bansaybansay sa panginabuhi sa gamayng katilingban.  [30]  leo_lastimosa@abs-cbn.com