Arangkada of Leo Lastimosa for May 7, 2008

          TABON DI TAMBAL

 

          Unsay imong himuon kon ang pangu sa nasud gipasanginlan nga nanikas sa piniliay ug nangawkaw sa katigayonan sa katawhan apan di masilotan—kay di kapasakaan og kaso, di madutlan og impeachment proceedings ug di gani mahikap sa bisan unsang imbestigasyon—tungod sa iyang paglubag sa tanang demokratikanhong mga institusyon?

          Kon matinud-anon kang nangandoy og katarung, mas palanugon nimong siyagit alang sa hustisya, mas hingusgan ang pakigbisog pagbutyag sa kamatuoran ug mas tuyhad nga mobarug pag-awhag nga kasilotan ang tanang nagbudhi sa katawhan.  Kon di kang katugot nga manghawod ang kasal-anan, di ka mohunong ni mangiyugpos hangtod nga ikapatigbabaw ang kaligdong.

          Apan alang sa taphaw nga mga oportunista, kansang bugtong tuyo mao rang pagbanos sa gahom, usbon na lang ang sistema sa kagamhanan.

-o0o-

          Ang gisugyot nga pagtukod og federal nga kagamhanan maoy labing dakong lipatlipat sa tinuod nga krisis nga giatubang sa nasud karon.  Labaw sa krisis sa bugas, nga gisugniban pag-ayo sa pamunoan pinaagi sa iresponsable ug makapaukyab nilang salida, ug sa nahaunang mga pagsuway pagwatas-watas sa batakang balaod aron kalugwayan pang ilang pagpahimus sa gahom, ang gibanhaw nga kampanya sa federalismo maoy mas dakong bugalbugal sa katawhan nga lunsay nga nagpakabana alang sa kausaban.

          Tinuod nga di ang Malakanyang ang nagduso sa federalismo.  Kon dili si Senate Minority Leader Aquilino Pimentel Jr.  Pagmatuod lang ni nga, kon ang kahakog na sa gahom maoy hisgutan, way kalainan ang mga haligi sa administrsyon ug oposisyon.  Lain ning pahinumdom nga di tang kasalig sa mga politiko kon gusto tang molingkawas gikan sa talikala sa katimawa ug mohaw-as gikan sa lawom nga gahong sa kaalaotan nga atong nahimutangan.

-o0o-

          Gitikas ang atong mga piniliay ug gikawkaw ang atong panudlanan di tungod sa atong sistema sa kagamhanan.  Kon dili tungod sa atong mga opisyal nga nisabotahe inay mopatuman sa atong mga lagda.

          Ang federal nga kagamhanan di garantiya nga di na malutsan ang atong mga lagda.  Ni panagang nga ang atong mga politiko di na magpahimus sa gahom aron pagpaburot sa ilang personal nga mga interes.

-o0o-

          Mahimong ang kinabag-an sa mga nagpaluyo sa federalismo maayo og tumong.  Mahimo ganing ang federalismo tinuoray nga makapalambo sa nasud ug sa katawhan.

          Apan di pa karon ang tukmang panahon pagduso ini.  Hangtod nga di mahusay ang ka-lehitimo sa mandato sa kagamhanan, hangtod nga di matubag ang mga pagduda sa kahiwian ug hangtod nga di ikapatigbabaw ang tinuorayng kabubut-on sa kinabag-an, ang bisan unsang kausaban sa sistema sa kagamhanan way kalainan sa plaster nga gitabon sa kabahong.

          Mahimong di na makit-an ang samad.  Apan wa mamatay ang kagaw.  Pabiling nag-umido ang ilawom.  Bisan pila pa ka sapaw nga pantalya di makapugong sa pagbuhagay sa nangalisbo nga duga sa mas nagkadako pang samad.  [30]  leo_lastimosa@abs-cbn.com