Arangkada of Leo Lastimosa for May 4, 2008

          ATONG GAPOS

 

          Unsaon pagtapak ang dakong kang-a tali sa katakos ug edukasyon sa atong mga gradwado ug sa panginahanglan sa mga industriya sa sud ug sa gawas sa nasud?  Sayon rang pag-awhag nga manlingkod ang mga representante sa kagamhanan, mga magpapatigayon ug mga tagduma sa edukasyon.  Sayon ra sab silang dasion nga magsayranay unsay labing dako ug dinaliang panginahanglan sa mga industriya.  Nga maoy pasikaran sa mga kolehiyo ug unibersidad pagtanyag sa mga kurso nga motubag sa mga panginahanglan.

          Apan ang kagamhanan, mga magpapatigayon ug mga tulonghaan di makabuot unsay kuhaon nga kurso sa mga tinun-an.  Ang pagpili sa mga kurso usahay manukad sa gusto sa mga ginikanan, o mga apohan, o sa hinigugma, o sa barkada.  Ug ang labing sayop sa tanan, pagtuman unsay gipitik sa imong kasingkasing.

-o0o-

          Gihatagan og mas dakong importansiya sa atong panahon karon ang mga kurso nga motino nga makatrabaho dayon ang gradwado.  Ug makauwarta.  Labing dali ug labing dako, labing maayo.

          Ang paglangyaw, o pag-alagad sa mga langyaw, maoy nitumaw nga labing makabuhong nga raket karon.  Sama niadto.  Ang nabuhong sa mga nagpabilin mao rang mga nagkonsabo pagbaligya sa interes sa nasud ug sa katawhan ngadto sa mga langyaw.

          Wa nay luna ang mga kurso pagtugkad sa tawhanong diwa ug pagbati.  Kay ang gikabuangan sa mga namunoan karon mao ang paglibog sa atong diwa ug pagbati.  Wa nay luna ang mga kurso pagpalambo sa paghigugma sa nasud.  Kay ang sukdanan sa gugma sa nasud mao nang gidaghanon sa dolyar nga mahakot.

-o0o-

          Ang labing dakong buslot sa sistema sa edukasyon di ang kapakyas pagtagbaw sa panginahanglan sa mga industriya.  Kon dili ang pagtudlo sa mga gradwado nga kutob ra sila sa pagyango sa mga lagda, pagpahaom sa ilang kaugalingon sa unsay naandan ug pagtigom og daghang kuwarta kutob sa mahimo.

          Gibugnaw sila paglantaw sa mas dakong hulagway, sa pagpangita og mas malungtarong sulbad sa atong mga suliran ug paghaw-as sa umaabot nga kaliwatan gikan sa lunangan nga atong nalubngan sukad pa sa atong katiguwangan.

-o0o-

          Sud na sa kapid-an ka katuigan, ang atong sistema sa edukasyon nigapos inay mopalingkawas unta nato.  Nibadlong nato nga ang pagbugtaw og kausaban, bisan unsa kamakiangayon, di angayng pangahasan tungod sa kahigayonan sa kaguliyang.  Bahala na kon ang gipanghadlok nga kagubot wa ra kumingking sa gilapdon sa pag-antos ug katimawa sa kinabag-an sa katawhan karon.

          Maong barawon nilang matinud-anon nga pagtuon sa atong kasaysayan.  Kay mas dako og kita ang paghimog world class welders sud lang sa pila ka semana.  Mas mahinungdanon kay sa pagtambal sa atong mga masakiton ang mga dolyar nga suhol pagkupay sa hugaw sa mga langyaw.

          Kanus-a pa man ta mohunong pagbaligya sa atong nasud ug katawhan?  [30]  leo_lastimosa@abs-cbn.com