Arangkada of Leo Lastimosa for May 3, 2008

          BUGKOS SA DUGO

 

          Bisan sa kalamposan sa nangaging Kapamilya Bloodletting, niadtong Pebrero nakatigom mig kapin sa 800 ka bags sa dugo sa usa lang ka adlaw, gibahaan lang gihapon mi og mga reklamo.  Ang blood donors nisumbong nga ang ilang blood donation cards wa ilha sa pipila ka pribadong mga tambalanan.

Samang reklamo ang gipadayag sa among kaabag nga mga ahensiya, ang Philippine National Red Cross (PNRC), Regional Blood Coordinating Council (RBCC) ug bisan ang Regional Blood Center (RBC) sa Department of Health (DOH), nga ang ilang dugo di dawaton sa pribadong mga tambalanan.  Gawas lang kon ipaubos og laing screening.  Nga nagkahulogan og lain na sang gasto sa mga pasyente.

-o0o-

          Among gisang-at ang sibaw nga mga reklamo ngadto sa kadagkoan sa DOH.  Kinsa nisubli pagtataw nga wa nay pribadong mga tambalanan nga gitugotan sa pagnegosyo og dugo.  Niangkon hinuon nga di sila kapugos sa mga ospital pagdawat sa dugo nga nakolekta sa nagkalainlaing ahensiya.

          Labi na atubangan sa katin-awan sa pribadong mga tambalanan sa Sugbo nga igo lang silang naneguro sa kahimsog sa ilang mga pasyente.  Di kalalis ang DOH sa gitumbok sa mga tambalanan nga nangaging mga kaso nga ang mga pasyente nga giabunohan og dugo natakdan sa mga sakit nga nakalusot sa screening sa ubang mga ahensiya. 

Kini bisan sa pasalig sa PNRC, RBCC ug RBC nga ang ilang kahimanan sama kaluwas, kon di man mas luwas pa, sa mga laboratoryo sa pribadong mga tambalanan.

-o0o-

          Ang sulbad nga gitanyag sa kagamhanan sa kontrobersiya:  I-centralize ang screening sa dugo pinaagi sa RBC.  Ug ang RBC nay mosuplay sa tanang panginahanglan sa dugo sa mga tambalanan.  Apan mapatuman lang ni kon duna nay igong katakos ug kahimanan ang RBC pag-screen ug pag-apud-apod sa dugo.

          May lig-ong sukaranan ang pagduda sa katakos sa kagamhanan pag-ilog sa gimbuhaton nga takos nga giduma sa PNRC, RBCC, RBC ug sa pribadong mga tambalanan.  Sa kasamtangan, unsaon pagpalambo ang suplay sa dugo?

-o0o-

          Mao ni sukaranan sa pagpangahas sa DYAB Abante Bisaya ug ABS-CBN Cebu pagpalapad sa Kapamilya Bloodletting.  Ning higayona, maglakip na sa labing dagkong pribadong mga tambalanan sa Sugbo.  Nangandam na ming daan nga ilang balibaran.  Maong labihan namong kuganga dihang niuyon sila pagpaluyo sa kalihokan.

          Busa sa labing unang higayon sa kasaysayan sa Sugbo magkadungan pagpangolekta og dugo ang Cebu Doctors Hospital, Chong Hua Hospital, Perpetual Succor Hospital ug Velez General Hospital uban sa PNRC, RBCC, RBC ug Cebu City Medical Center (CCMC).

Silang tanan manghatag og blood donation cards.  Nga mopasalig nga ang donors, kon sila na say magkinahanglan, malibre sa dugo ug gasto sa screening.  Ang CDH nipasalig pa gani paghatag og 35% nga diskuwento sa charity cases ngadto sa tanang mohatag og dugo nila.  [30]  leo_lastimosa@abs-cbn.com