Arangkada of Leo Lastimosa for May 2, 2008

          KAHIGWAOS SA CANADA

 

          Nagsugwak ang kaliboan ka mga aplikante sa Kapamilya Overseas Job Fair alang sa Canada, Estados Unidos, Australia ug ubang kanasuran nga gipahigayon sa DMDP-Cebu City government sa classrooms sa Abellana National School.  Gikan sila sa Sugbo ug kaasilinganang mga lalawigan sa Kabisay-an ug Mindanao.  Ang ilang mga panagway pulos malaumon nga makalandig og trabaho sa langyawng kabaybayonan nga nagtanyag og mas dakong suholan.  Bahala na kon ang bugti mao ang pagbiya sa ilang mga pamilya ug pagtalikod sa ilang yutang natawhan.

          Silay mga biktima sa labing dakong katalagman sa atong panahon.  Ang kakuwang sa trabaho sa ilang kaugalingong nataran.  Ang pipila nga kapilian nagtanyag og suholan nga kuwang pagtagbaw bisan sa labing batakan nilang panginahanglan.

-o0o-

          Dul-an sa 50 ka placement agencies, nga nagtanyag og dul-an sa 10,000 ka mga trabaho, ang nisalmot sa tibuok adlaw nga kalihokan.  Kon motakdo pa lang unta ang edukasyon ug katakos sa mga aplikante ngadto sa mga panginahanglan sa langyawng mga kompaniya, magngisi untang tanan human sa kalihokan.  Magsaulog untang mga pamilya nga paulian sa mga aplikante.

          Apan pait ang kamatuoran:  Mas daghang mga aplikante nga maghuyhoy ang mga abaga.  Ang mas sakit nga kamatuoran mao nga di sila maoy sad-an.  Igo lang silang nalamoy sa higanteng kang-a tali sa nakat-onan sa mga gradwado ug sa aktuwal nga panginahanglan sa mga industriya.

          Kapait.  Nabuktot ang mga ginikanan pagbayad sa matrikula sa ilang mga anak nga nanguha sa mga kurso nga di diay kapuslan.  Ang mga tulonghaan ug mga kompaniya morag nagpuyo sa duha ka buwag nga langob nga wa maghibaw-anay.  Ug ang kagamhanan pabiling pakyas sa pagputol sa ilang binungolay.

-o0o-

          Usa sa mga hinungdan nganong labihang daghana sa nidagsa nga mga aplikante mao ang gitanyag nga mga trabaho sa Canada.  Nga madanihon kaayo di lang tungod sa kadagko sa suholan ug mas maayong kahimtang sa trabaho kon dili tungod sab sa kayano ra sa skills nga gikinahanglan.

          Apan sa 125 ka accredited nga placement agencies nga dunay aprobado nga job orders alang sa Canada, lima ray nisalmot.  Ang kinabag-an natagbaw na sa gidaghanon sa mga aplikante nga ilang nadawat gikan sa Metro Manila ug kasilinganang mga dapit sa Luzon.

-o0o-

          Di hinuon sila mapugos pag-anhi sa Sugbo.  Kay madugangan man ang ilang gasto.  Mas madanihon alang nila nga magpaabot na lang sa mga aplikante nga maoy manuktok sa ilang mga buhatan sa kaulohan.

          Apan di makiangayon nga maglaway lang ta.  O magpaabot na lang sa salin.  Di pa hinuon mahurot ang gibanabanang 350,000 ka trabaho sa Canada karong tuiga.  Busa angayng pahibaw-on ang placement agencies nga dunay daghang mas takos nga mga aplikante sa Sugbo, Kabisay-an ug Mindanao.  Aron sila nay magharab-harab pagpalapad sa ilang recruitment dinhi.  [30]  leo_lastimosa@abs-cbn.com