Arangkada of Leo Lastimosa for May 6, 2008

          HUKAS SA KAHAKOG

 

          Managsamang tagduha ka lingkoranan ang gitugyan alang sa mga mamumuno ug mga magpapatigayon sa regional wage board.  Ang naghupot sa nahibilin sa pito ka mga lingkoranan sa board mao ang tulo ka mga representante sa kagamhanan.

          Ang pangu nila mao ang direktor sa DOLE.  Makabotar lang siya kon dunay tabla.  Ang laing duha ka mga sakop mao ang mga direktor sa DTI ug NEDA.  Nga pulos makaapil sa tanang tigom ug botasyon.

          Mao nay usa sa labing dakong buslot sa balaod nga nagtugyan sa wage board sa gahom pagtakda sa usbaw sa suholan.  Kay ang DTI ug NEDA di mahitabong modapig sa mga mamumuo.

-o0o-

          Di hinuon hingpit nga matulisok ang mga direktor sa DTI ug NEDA sa ilang kanunayng pagdapig sa mga magpapatigayon:

·        Ang DTI gitahasan pagpalambo sa patigayon ug industriya, busa dagway sa mga magpapatigayon ang kanunay nilang ikaatubang ug ang mga suliran ug mga panginahanglan sa mga patigayon ug industriya ang kanunay nilang madunggan; sa pikas nga bahin

·        Ang NEDA dugay rang nabisto hain kapusta—silay nag-ingon nga ang usa ka pamilya nagkinahanglan og kapin sa P800 aron mabuhi matag adlaw, apan sila ra say nangugat paglansang sa minimum nga inadlawng suholan sa P250—gawas nga hagbay rang nabuong ang ilang kaligdong tungod sa pag-inat-inat sa mga numero, malambuon ang ekonomiya atol sa SONA apan dako ang alkanse sa mga magpapatigayon kon maghisgot nag uminto sa suholan.

-o0o-

          Ang duna ray direktang kalambigitan sa mga mamumuo mao ang DOLE.  Kay siyay gitahasan pagsusi sa ilang kahimtang, pagpaminaw sa ilang mga yangungo, paghusay sa ilang panagsungi uban sa kompaniya ug pagpanalipod sa ilang mga interes.

Apan ang direktor sa DOLE, bisan siyay tagduma sa mga tigom isip tsirman sa board, di makapadayag sa iyang baruganan kay kanunayng 4-2 ang sangpotanan sa botasyon:  Magkauyon ang duha ka representante sa management ug ang duha ka representante sa gobyerno batok sa duha ka representante sa labor.

Maong ang bugtong dag-anan sa labor mao ang pag-usab sa balaod nga nagtukod sa wage board.

-o0o-

          Ang labing sayon nga kausaban mao ang pagtangtang sa gahom pagbotar sa mga diektor sa DTI ug NEDA.  Himuon na lang silang resource persons sa board.  Nga konsultahon uban sa nagkalainlaing hut-ong sa katilingban sa tinuig nga pagsubli sa suholan ug mga benepisyo sa mga mamumuo.

          Laing kausaban mao ang pagsud sa Kongreso matag lima o 10 ka tuig pagsubli sa mga suholan nga gitakda sa wage board.  Ning paagiha, matino ang kamakiangayon sa suholan sa matag rehiyon.  Labi na sa mga dapit, sama sa Sugbo ug Central Visayas, nga ang mga anak sa singot kanunay lang mahiagom sa katihik ug kahakog sa mayoriya sa mga sakop sa board.  [30]  leo_lastimosa@abs-cbn.com